علاش تلمني على كتف طاير
نقرب منك تنفخ فوجهي ونشوفك حاير
الإعاقة مشي حرام
كن متواضع من اهل الكرام
شوف شكون ليقاصي معيا وعليا خدام
الميمة على ودي قادرة توطي كدام
علاش تصهدني بكلامك وتقتل فيا شلى أحلام
خليني نكابر من حقي نزيد القدام
علاش تنزل عليا فاس ردام
علاش تلمني على رجل طايرة
واش ممتي لهازني ولا مك لحايرة
علاش تلمني حيت على الكرسي مشلول
إرادة الله بغات ولجا من عند الله مقبول
خلقني ربي مكفوف
وانت علاش تنفخ فوجهي واش هاز عليا القفوف
وكن حنين يا العربي كن عطوف
راه الإعاقة بالتفكير
شحال من مومن رماوه بالتكفير
الإعاقة نعم جسدية
والإرادة صلبة قوية
خوي المسلم خليني بحالك نحلم
من حقي نتحب ونتغرم
لتقطع فيا الطموح
لا تطعني بكلامك وتجب ليا الذبوح
وبصحتك تتغر وتفوح
راه الدنيا دوارة
وشحال قدها تصبر النورة
اه يا ربي على القوم الغدارة
هدشي حرام شوف الكفار والنصارى
وليدك يا الميمة معاق
قتلوه أهل البخ والنفاق
نظرات منهم مرة فالمذاق
طلقوا عليا القرطاس طاق طاق
اميمتي سمحي ليا هذه إرادة العاطي
الحمد لله بها انا راضي
شحال قصيتي معيا فالليالي
تهزيني كميشة وبيا تلالي
البو سمح فالضانة
قالها ومحشمش ذريتك خيضانة
هو اللول طعني بالسيف منو جات الخيانة
خلى الميمة تشوف المحاين
شلى عراسي خدمات شلى جناين
واليوم انا نقول يا الحوت الميز كاين
ولي قال لا أكبر خاين
تحياتي واسمحوا لي فلقد كتبته مباشرة بلا قلم وبلا ورقة فقط عندما قرأت المنشور حفزني لهذه الكلمات القليلة في حق هذه الشريحة المجتمعية العريضة التي تعاني من الحيف والتميز والنكران
ليست هناك تعليقات:
إرسال تعليق