هو انا من نفسى فين ؟.*** بقلم فهمي علي
- هو انا من نفسى فين ؟... ليه باتوه جوا السنين ؟
- ليه باحس العمر حيرة .... بين حاجات متفرقين ؟
- بكره.. عمرى ما خوفت منه... قلبى متطمن بربى
- عهدى بيه ... خلانى عارفه ..ف اللى جاى واقف ف جنبى
- ايوا كل الماضى عيشته ...او عشقته و كنت فيه
- قلبى عاش افكارى جدا ... الا حلمى ... مش لقيه
- روحت ياما كتير اماكن ...شوفت ناس و عرفت ناس
- ناس بتعرف تبقى منك .. ناس دهب و ياقوت و ماس
- شوفت ناس جرحتنى جدا .. قلبى منهم عاش مرار
- داسو فيا بكل قسوة ... شددو عليا الحصار
- بس من قلبى مسامحهم ... روحى كارهة الانتقام
- ربى يصلح بس حالهم .... ربى يملاهم سلام
- زورت ياما كتير اماكن ... و الكتير منهم بعيد
- اللى عاش جوايا .. بيتنا ... ديما طعمه شئ جديد
- اهلى ... ناسى .. و الطفولة ... و الحبايب و الصحاب
- و السنين البدرى جدا ... و الحياة قبل الشباب
- عمرى ما نسيت مصطبتنا .. و السهر ... و كلوب نور
- لعبة واحدة و خمسة ستة ... يلعبوها .. و الف دور
- و الشباب لما ابتدينا .. يظهر الشعر فى وشوشنا
- و السهر للصبح و احنا .. مستحيل فيه شئ يحوشنا
- و الحكاوى .. و كنت ناوى.. و انت غاوى تكون صريح
- و الصراحة كتير بتجرح .. فى النهاية تبات جريح
- و انتظار الساعة خمسة ... و ام كلثوم لما تبدأ
- لسه فاكر ... يا واحشنى ... عادة يومى طريق و مبدأ
- كل دا ... و ما لقيتش نفسى .. غير فى حلم غرقت فيه
- رغم سنى ... خدنى منى .. عمر قلبى ما يوم نسيه
- طوفت وحدى بلاد كتيرة ..و النجاح كان ديما صاحبى
- ايوا صح فشل صادفنى .. بس عمرى ما كنت باحبى
- حتى لما كات بتضيق .. نور فى وسط العتمة يظهر
- الحياه تفتح بيبانها ...تبقى انضف ... تبقى اطهر
- ناس كتير نسيت جمايلى ..ناس كتير باعوا و خانوا
- جرحوا فعلا مشاعرى .. ناس كمان للود صانوا
- مسحوا بجمالهم دموعى.. طبطبوا بحنان عليا
- خلوا قلبى بين ضلوعى .. يهدا او ينسى الاسية
- كنت اشوف الخلق خايفة .. م اللى يمكن بكره جايبه
- روحى كانت فيا تضحك .. و القلق كان قلبى سايبه
- جوا منى كنت شايف .... ان ربى رايدلى خير
- و انه شايف انى عبده ... اللى ما خالفش الضمير
- ياما كنت استنى بكره .. و ف يقينى يكون جميل
- و اللى كنت باشوفه عنده .. كان دليل فوق الدليل
- السنين جريت فى عمرى .. شعرى شاب ... جوايا لأ
- لسه مستينى آجى .. نفسى اشوفنى .. و عندى حق
- نفسى اقوللى بجد مالك ؟ .. و انت زعلان منى ليه ؟
- نفسى اقوللى ازى حالك ؟ .. طب صحيح .. اخبارك ايه ؟
- نفسى امد ايديا فيا ... و المس الحتة البعيدة
- نفسى ابص كدا فى عنيا .. و اقرا فيها حاجات جديدة
- نفسى اتصاحب عليا .. نفسى يوم اخرج معايا
- ايدى تمسك تانى ايدى .. و ابتدى اعيش الحكاية
- و احضن الحلم اللى فعلا.. يوم قابلته بدون معاد
- نلتقى احنا التلاتة .. صحبة ... و نسافر بلاد
- يبقى كل ما فينا فرحة .. و الرضا يرخى ستايره
- فوق قلوب تاهت .. و رجعت .. و الصفا تطرح بشايره
- و القى كل الدنيا سمعت
- #فهمى_على
ليست هناك تعليقات:
إرسال تعليق